Vísnagáta dagsins.

Eins og komið hefur fram hjá mér mun ein gáta birtast á dag í einhvern tíma. Vísnagáturnar eru eftir ýmsa höfunda.

 

Vísnagáta dagsins er eftirfarandi.

 

Kennt við hrogn til háðungar.

Haft um báðar mjaltirnar.

Klæðskerinn það tekur títt.

Töluvert er um það kýtt.

Svar: Mál.

 

Svar og höfundarnafn óskast.

Rétt svar gaf: Óskráður Veigar Freyr Jökulsson.

 

Svar mun verða staðfest þegar rétt svar er komið, ef ekki kemur rétt svar fyrir klukkan 22.00 sama dag mun bloggari birta svarið í færslunni.

Athugasemdir

[Veigar Freyr Jökulsson 4.4.2007 kl. 10:44]

Þetta hlýtur að vera orðið mál.

- Hrognamál - dönsku til háðungar.

- Missa máls - missa úr mjaltir

- Klæðskerinn  tekur mál.

- Og sem betur fer kýtum við ennþá um málið :)

--

Veigar 

[Sigfús Sigurþórsson., 4.4.2007 kl. 11:34]

Það er að sjálfsögðu rétt svar Óskráður Veigar Freyr Jökulsson.

Mál er svarið, en hefur þú höfundarnafnið?

[Veigar Freyr Jökulsson 4.4.2007 kl. 12:45]

Nei, ég þekki það ekki, rak bara augun í þetta hjá þér og datt niður á svarið.., en þetta er mjög skemmtilegt framtak, ef þú hefur gaman af þessu þá vil ég benda þér á vikublaðið Dagskráin sem er gefið út á Selfossi þar hefur vísnagáta verið fastur liður, blaðið má nálgast á slóðinni:
http://www.sudurland.net
Ég vona að ég sé ekki að brjóta nein höfundarréttarlög með því að gauka að þér vísunni í nýjasta blaðinu:

Fínust þetta flíkin ber.
Fara strákar í hann hér.
Gamlir þetta gjarnan fá.
Girnilegt á eldhúsrá.

--
Veigar

[Sigfús Sigurþórsson., 4.4.2007 kl. 13:27]

Sæll Veigar, hahaha nei þú ert ekki að því, já ég hef gaman af þessu og ég kíki alltaf reglulega á Dagskrána.

Og nú gáum við bara hvort einhver sem les Athugasemdirnar hefur svarið fyrir kvldið við þessari nýju gátu  Annars birtum við það í kvöldm hvernig lýst þér á það?